Laster lau urte beteko dira Asojubibbk erakundeak eta Euskal Herriko Kontsumitzaileen Batasunak (EHKB) hitzarmena sinatu zutela.
Gero eta afiliatu gehiagok erabiltzen dute emaitza bikainak ematen dituen zerbitzu hori.
Urtean hirutan, EHKBk kolaborazio bat bidaltzen digu aholkularitza orokorra emanez, eta gure blogean argitaratzen dugu.
Oraingo honetan, egoitza aldatu berri dutela-eta, egokia iruditu zaigu bai EHKB eta bai Ana, bertako idazkari nagusia, sakontasun handiagoz ezagutzea.
Horregatik, bulego berri dotoreetan elkarturik, honako elkarrizketa hau izan dugu:
ASOJUBI: Lehenik eta behin, zorionak egoitza berri honengatik. Zoragarria da. Zalantzarik gabe, ederki islatzen ditu EHKB egiten ari den lan ona eta izan duen hazkundea.
ANA: Eskerrik asko zorionengatik. Argi dago aurreko egoitza txikia geratu zitzaigula. Langile bakoitzak bere espazioa izateko leku bat behar genuen.
Orain, pertsona gehiagori eman diezaiokegu arreta aldi berean, toki bereizietan, kontsumitzailearen pribatutasuna mantenduz.
Aldaketa honen premian geunden.
ASOJUBI: Ia lau urte igaro dira gure arteko akordioa sinatu genuenetik. Gure kolektiboari dagokionez, merezi izan duela iruditzen zaigu. Eta zuen aldetik? Zer nabarmenduko zenuke?
ANA: Oxala askoz gehiago balira. Egia esan, oro har kolektibo lasai eta atsegina da Asojubi, eta enpatia-maila zabala du gure lanarekiko.
Asojubik argi dauka irabazi-asmorik gabeko elkarte bat garela eta bertan lan egiten dugunok baliabide-ahalmen mugatua dugula, baina jo eta ke aritzen garela lanean, guztiengana iritsi ahal izateko. Asojubik badaki hori.
ASOJUBI: Kontsumitzaile naizen aldetik, iruditzen zait gero eta zailtasun handiagoak dauzkagula gure eskubideak defendatzeko. Dirudienez, multinazionalen domeinua, zerbitzuak edo ondasunak Internet bidez erostea eta bururatzen zaigun guztia arriskutsua izan daitekeen bilakaera bat izaten ari da. Esaguzu zergatik den garrantzitsua EHKB bezalako erakundeak egotea.
ANA: Kontsumitzaileen defentsa gure gaur egungo bizimodura eta kontsumo-modu berrietara egokitzen ari da. Kontua da ezinezkoa dela arauak bizitza aldatzen den abiadura berean egokitzea.
Horregatik, gure lana funtsezkoa da kontsumitzailea etengabe mugitzen ari den prozesu horretan guztian laguntzeko, informazioa emateaz gain kontsumitzailea prestatzeko eta bere eskubideak defendatzeko.
Nire ustez, uneotan kontsumitzailea beharrezkoak diren bitarteko guztiekin ahalduntzea da garrantzitsuena, produktu edo zerbitzu bat kontratatzeko orduan erabaki optimo eta lagungarriak hartu ahal izan ditzan.
Oso ahalduntze zuzenarekin, prestakuntza eraginkor, xume eta praktikoarekin.
Nire iritzian, herritarrak informatzeko modua ez da garaiotan egokia izaten ari. Hainbeste informazio daukagunez, gaininformatuta gaude. Azkenean, alde guztietatik jasotzen dugunez informazioa, nahasi egiten dugu dena, eta nork bere ondorioak ateratzen ditu. Eta ondorio horiek, askotan, ez dira zuzenak izaten.
Eta horri jauzi digitala, produktuak eta zerbitzuak erosteko modu berriak, ordainketa-plataforma berriak, gure harremanetako presentzialtasun eza eta abar erantsiz gero, kontsumitzailea askoz kalteberagoa bihurtzen da. Engainatzen erraza den kontsumitzailea, edo, besterik gabe, pixkanaka-pixkanaka baztertzen doana.
Eta horretarako dago EHKB; hots, gaur egungo kontsumitzailearen kalteberatasun hori zaintzen saiatzeko.
ASOJUBI: Bankaren mundutik datozen erretiratuek osatzen dute gure elkartea. Konta iezaguzu zein diren sektore horretako gorabehera ohikoenak.
ANA: Egia da bankaren mundutik zatoztenez, kezka gehien eragiten dizkizueten gaiak banketxeekin lotutakoak direla: bidegabeko komisioak, BGAEak, hipoteka-gastuen itzulketa… Erreklamatzen dituzuen beste gai batzuen artean, bidaia konbinatuak, etxe-aseguruaren parteak eta, logikoki, autoen kartelaren gaia daude.
ASOJUBI: Mintza gaitezen orain zuei buruz. Azal iezaguzu nolakoa izan den EHKBren bilakaera.
ANA: Atsegin handiz jakinarazten dizuet EHKBk 40 urte beteko dituela 2025eko martxoaren 20an. EHKB 1984an jaio zen, koltzak kaltetutako guztiei laguntzeko asmoz.
Gaur egun, Euskadiko kontsumitzaileen elkarterik zaharrena da. Oso une txarrak igaro ditugu, irauteko zailtasun handiekin. Elkarte-mugimenduak eragozpen ugari izan ditu Euskadin, eta Administrazioak oso baztertuta zeukan kontsumoaren gaia. Gaur egun, egoera desberdina da. Administrazioak, orain, babestu egiten du gure lana, eta nabaritu egiten da.
Euskadiko batzorde aholku-emaile guztietan gaude, kontsumitzailearen interesak babestuz. Eta gure hitzak oihartzuna du.
Azken urteotan, EHKB hazten joan da, kontsumitzailearen problematika hazten joan den bezala. Markatzen zaigun erritmora egokitzen joaten gara, atsedenik hartu gabe.
ASOJUBI: Zuri buruz ere zertxobait gehiago jakin nahiko genuke.
ANA: Tira, pertsonalki apur bat ezagutzen nauzuenok badakizue gerlari bat naizela. Asko gustatzen zait nire lana, eta, egia esan, oso harro nago inguruan dudan jendeaz.
Orain, Bizkaian, lankide berri bat daukagu. Buru-belarri aritzen da lanean eta bikain ebazten ditu arazoak. Horrek erraztu egiten du talde-lana eta dena biribilago joaten ari zaigu.
Bide batez, kontatuko dizuet EHKB Espainiako kontsumitzaileen konfederazio baten barruan sartu dela, ConsumES izenekoan. Hasiera-hasieratik, Euskadik Kantabriako, Galiziako, Kataluniako, Gaztela eta Leóngo, Valentziako Erkidegoko eta Aragoiko elkarteekin batera sortu du.
Euskadiren eskuetan dago oraintxe konfederazioko Idazkaritza, eta ni naiz kargu hori betetzen ari dena.
Eta ni pozik, beste autonomia-erkidego batzuetako lankideek horretarako bozkatu nautela ikusita. Txukun aritzea espero dut, egia esan.
ASOJUBI: Gogora iezazkiguzu zuen helbide berria, harremanetarako moduak eta kontsumoari buruzko webgune interesgarria.
ANA: Rodríguez Arias kalearen 23.ean gaude, 2. solairuan, 15. sailean.
Harremanetarako gainerako datu guztiak lehengo berdinak dira; ez dira aldatu.
ASOJUBI: Mila esker eskainitako denboragatik.
ANA: Eskerrik asko zuei, guztiagatik. Askoz urte gehiago eman ditzagula elkarrekin!
