Zaragusta, Agencia de Visitas turísticas de Zaragoza y Aragón
Pandemia baino lehenagotik hasi ginen Aragoiko gune erakargarri batera, Teruelgo Maestrazgora, txango bat antolatzea pentsatzen.
Uste dugu ordua iritsi dela asmo hura gauzatzeko.
Horretarako, Zaragozan egoitza duen turismo-enpresa baten aholkularitza eta laguntza bilatu ditugu, berari buruz oso erreferentzia onak ditugu eta: Zaragusta (www.zaragusta.com)
Bere CEO eta sortzailea den Lorenzo J. Ibañezekin izan dugu elkarrizketa. Espero dezagun, irakurri ostean, gure elkartekideek, baita Euskaditik kanpo bizi direnek ere, jarduera honetan parte hartzeko izan dezaketen interesaren ondorioz, jarduera hau burutzeko talde nahikoa osotzea.
Asojubibbk: Lorenzo, gaian sakon sartu aurretik, esaguzu zerbait zutaz, zure prestakuntzaz eta esperientziaz.
LORENZO: Kaixo, Jorge! Niretzat, batez ere, atsegin handia da zuek bezainbeste inplikatutako talde bati gure zerbitzuak eskaintzea turismo-enpresa gisa. Horregatik, bidaia hau erronka handi bat lez hartzen dut, eta ilusio handiarekin diseinatutako ibilbidea da. Ni ekintzaile zirkunstantziala naiz, Zaragozako Unibertsitatean Artearen historialari gisa prestatua, eta irakasle izateko bokazioarekin. Nire abentura profesionala ostalaritza turistikoaren munduan lanean hastearekin abiatu zen. Hain zuzen ere, nire lehen destinoetako bat Maestrazgoa izan zen, Villarluengo ondoko hotel batean arduradun gisa lan eginez. NH, Zenith edo Catalonia kateetan lan egin ondoren, nire benetako bokazioari ekin nion, Zaragozan bisita gidatuen enpresa bat, Zaragusta, sortzea, denborarekin Aragoiko autonomia-erkidego osora zabaldu dena. Bestalde, turismo-irakasle gisa egin ahal izan dut nire karrera irakaskuntzan, langabeentzako profesionaltasun-ziurtagirietako ikastaroetan. Horrek guztiak turismoari buruzko 360 graduko ikuspegia izateko aukera ematen dit.
Asojubibbk: Halaber, uste dut interesgarria dela sortu zenuen enpresaren alderdirik garrantzitsuenak ezagutzea: noiztik ari den, nortzuk zareten, jarduera ohikoenak, etab.
LORENZO: Enpresa, ideia gisa, 2008an sortu zen, Zaragoza hiriak nazioarteko erakusketa bati aurre egin behar izan zionean eta turismo-azpiegitura garrantzitsu bat behar zuenean. Azkenik, ideia 2017an gauzatu zen, bisita gidatuetan merkatu-hobi bat betetzeko eta sektorea profesionalizatzeko. Hasieran talde txikientzako bisitak egiten hasi ginen, baina gero Civitatis bezalako plataforma handiekin elkarlanean, eta horrek marka gisa ikusgarritasuna eman zigun; eta, geroago, erakunde publikoekin lan egin genuen, hala nola Zaragozako Udalarekin edo Aragoiko Gobernuarekin. Gaur egun, bisita turistikoak edo hiriko monumentu garrantzitsuenen bisitak egiten ditugu eta, azkenaldian, museo publikoak ere kudeatzen ditugu. Gure plantilla handitu egin da eta erreferentziazko enpresetako bat gara Zaragoza hirian.
Asojubibbk: Zalantza barik, Matarraña, Javalambre, Teruel, Albarracín eta abarretara egiten direnez gain, Teruelgo ekialdera egiten diren bisitak, batez ere Maestrazgora, gehitzen ari dira azken urteotan. Zure iritzi adituan, zeintzuk dira Maestrazgoa bisitatzeko arrazoi nagusiak?
LORENZO: Aragoiko Autonomia Erkidegoaren barruan, zalantzarik gabe, Teruelgo probintzia oraindik ezagutzeke dagoen eremua da, eta bereziki Maestrazgoa, interes bereziko eremu naturala baita, masifikazio gutxikoa eta turistarentzat ezezaguna. Horrek balio handia ematen dio xarma handiko herriak ezagutzeko, gainera denbora luzez bakartuta bizi izan den jende baten historia aberatsa du, eta bere historia eta ondaretik hori zuei erakutsi ahal izatea espero dut.
Asojubibbk: Ibilbidea Zaragustaren aterkipean joan gara lantzen, bereziki zurekin, enpresaren ordezkari gisa. Elkartekide bakoitzak laster izango du programa eskura. Bisita interesgarrienetako batzuk aurreratu ahal dizkiguzu azalpen labur batekin?
LORENZO: Zalantza barik, erakargarri turistiko ugari eskaintzen dituen bidaia honetan, Zaragoza barruan Salbatore Katedrala eta hango tapizen museoa nabarmenduko nituzke. Leku ezezaguna da, baina garrantzi historiko handia du, eta tapiz-bilduma munduko garrantzitsuenetakoa da. Zaragoza inguruan, Belchite herri zaharra ezinbestekoetako bat da, bere hondakinetan oraindik ere uler daitekeelako Gerra Zibilaren historia. Terueli erreparatzen badiogu, Teruel hiriburuaren magia nabarmenduko nuke, musulmanek mudejarrean lagatako eraginagatik, baina baita bertako eraikin modernistengatik ere. Hala ere, leku nagusia Maestrazgoa izango dela uste dut, parke geonatural ikusgarria baita, bertan daude eraketa geologiko bereziak (Montoroko Organoak), Pitarque ibaiaren sorburua edo Mirambel edo Cantavieja herriak, non denbora geldi geratu dela ematen duen. Bertako eskaintza gastronomiko guztia ere ezin dugu ahaztu: Zaragozako ortuari edo barazkiak, Teruelgo urdaiazpikoa, boilurra eta, nola ez, ardoak.
Asojubibbk: Berba egiguzu, mesedez, honelako ekitaldi bat antolatzeak duen konplexutasunaz.
LORENZO: Jakina, hain bidaia pertsonalizatua antolatu ahal izatea, zalantza barik, prozesu konplexua izaten da. Gure kasuan, Aragoiko gida ofizial gisa dugun eskarmentuan oinarritzen gara. Bidaia-agentzia bat ez garenez, are konplexuagoa da, ez baitugu tarifak negoziatzeak eskatzen duen esperientziarik, baina hori gidari gisa dugun ikuspegiak konpentsatzen du, beste batzuetan funtzionatu diguten txangoak, jatetxeak eta ostatuak aukeratuz. Guretzat erronka bat da, eta hain konbentzionalak ez diren baina erakargarriak diren lekuak eskaintzeko aukera gisa hartzen dugu.
Asojubibbk: Gure aldetik, eta amaitzeko, txango eder honek behar duen bezainbesteko interesa piztea nahi dugu. Euskaditik kanpo bizi direnentzat ere bai, beraien zain izango baikara Zaragozan, jasoko duten zerbitzura egokitutako prezioarekin. Giroa zoragarria izango da eta ingurua oso interesgarria da. Lorenzo, beste zerbait erantsi nahi duzu?
LORENZO: Zuekin batera, lurralde honek eskaintzen dituen mirariez gozatzea espero dugu. Aragoiko enbaxadore gisa egiten dugun lanaren alderdi gehiago ezagutu nahi badituzue, gure web-orria zaragusta.com eta gure lan guztia islatzen duen web-orria aragusta.es azter ditzakezue.
Bestalde, hemen duzue nire profil profesionala ere: https://www.linkedin.com/in/lorenzo-j-ibáñez-espiago-0b0b0b57/
Mila esker eta laster arte!
————————————————————————————————-
ELKARRIZKETAK ELKARTEAN – ERANSKINA
Azkenean, Elkarteak uko egin dio txango hau antolatzeari, oso erakargarria den eta bere antolaketan ordu asko eman ditugun arren. Horretan, bereziki, turismoaren egoerak eragin du, eta horrek hoteletan izan duen ondorioak, honako hauetan islatu denak:
- Prezioen igoeran, batez ere taldeentzat.
- Negoziatzea onartu dutenek eskatutako fidantzetan, betiere, gurea bezalako kolektibo batentzat, erreserbak aurretiaz denbora gehiegiz berretsi beharrarekin.
BFAren dirulaguntzetarako mugek ere eragina izan dute; izan ere, egun bakarreko txangoetarako bakarrik dira orain.
Argi utzi nahi dugu elkarrizketa ugari izan ditugula Lorenzorekin, eta horietan guztietan elkarlanerako jarrera bikaina izan dugula, Zaragozan hasi eta bertan bukatzeraino ibilbide osorako haren konpainia zegoelarik programatuta. Antolaketari ordu asko eskaini dizkion arren, ez digu ezelango kopururik fakturatu nahi izan. Berarentzat gure esker on guztia, eta Aragoin haren zerbitzuak erabiltzeko gomendioa egiten dizuegu.
Halaber, eskerrak eman nahi dizkiogu Ikea Bidaiak-eko Paulari egindako ahaleginagatik, azkenean harengana jo baikenuen, baina ezin izan zuen arrazoizko eskaintzarik lortu.
Azkenik, garbi utzi behar dugu, prezioa eta baldintzak kontuan hartuta, eskaintza ona jaso dugula Zaragozako Sercotel Plaza Feria hotelaren aldetik, eta gure kolektiboarekiko abegikor izan dela.
Prestatutako programa doa honekin batera, norbaitek bere kabuz egin nahi badu. Uste dugu oso gomendagarria dela.
